Dövlət Sərhəd Xidmətində “9 noyabr – Dövlət Bayrağı günü” silsilə tədbirlərlə qeyd edilir. Bütün hərbi hissə və bölmələrdə keçirilən mədəni-kütləvi tədbirlərdə elm və incəsənət xadimləri, yerli icra hakimiyyəti orqanlarının və ictimaiyyətin çoxsaylı nümayəndələri iştirak etmişlər.
08 noyabr 2018-ci il tarixdə Dövlət Bayrağı günü münasibəti ilə Nəsimi Rayon İcra Hakimiyyətinin təşkilatçılığı ilə Dövlət Sərhəd Xidmətinin Sahil Mühafizəsində təntənəli tədbir keçirilmişdir. Tədbir iştirakçıları əvvəlcə Heydər Əliyev İdeoloji mərkəzi ilə tanış olmuş, Ulu Öndərin büstünün önünə əklil qoymuşlar.
Dövlət himninin səslənməsi ilə başlanan mərasimdə Dövlət Sərhəd Xidmətinin rəisi general-polkovnik Elçin Quliyevin təbrik teleqramı şəxsi heyətə çatdırılmışdır. Mərasimdə Azərbaycan tarixinin şanlı səhifələrindən olan Azərbaycan Xalq Cümhuriyyətinin yaranması və şərqin ilk demokratik respublikasının dövlət rəmzi olan üçrəngli, ay-ulduzu bayrağın qəbul olunması haqqında ətraflı məlumat verilirmiş, bu əlamətdar hadisənin təkcə Azərbaycan üçün deyil bütün müsəlman dünyası üçün mühüm əhəmiyyət kəsb etdiyi vurğulanmışdır.
Tədbirdə Azərbaycan Xalq Cümhuriyyəti süquta uğradıqdan 70 il sonra üçrəngli bayrağımızın məhz Ulu Öndər Heydər Əliyevin təşəbbüsü və iradəsi sayəsində yenidən bərpa edilərək 17 noyabr 1990-cı ildə Naxçivan Muxtar Respublikasının, 5 fevral 1991-ci il tarixdən isə Azərbaycan Respublikasının rəsmi dövlət bayrağı kimi təsdiq olunması minnətdarlıq hissi ilə qeyd olunmuşdur.
Azərbaycan Respublikasının müstəqilliyi bərpa edildikdən sonra dövlət bayrağımızın milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrilməsi, dövlət bayrağına hörmət və ehtiramın ən böyük nümunəsini Ulu Öndər Heydər Əliyevin və Azərbaycan Respublikasının Prezidenti cənab İlham Əliyevin nümayiş etdirmələri qürur hissi ilə vürğulanmışdır.
Möhtərəm Prezidentimiz İlham Əliyevin dövlət bayrağımıza yüksək məhəbbətin təzahürü olaraq 2007-ci il noyabrın 17-də Bakıda Dövlət Bayrağı Meydanının yaradılması barədə, 2009-cu il noyabrın 17-də isə Dövlət Bayrağı Gününün təsis edilməsi haqqında sərəncamlar imzalaması və Dövlət Bayrağı Meydanının açılışında «Bizim bayrağımız qürur mənbəyimizdir. Bu bayraq bizim milli dəyərimizdir. Bu Bayraq Meydanının yaradılması Azərbaycanın gücünü, Azərbaycan xalqının öz dövlətinə sevgisini, dövlət rəmzlərimizə ehtiramımızı göstərir» deməsi iftixarla xatırlanmışdır.
Mərasimdə çıxış edən Nəsimi Rayon İcra Hakimiyyətinin başçısı Asif Əsgərov bayram münasibəti ilə sərhədçiləri təbrik etmişdir.
Tədbirdə Heydər Əliyev dövlətçilik ideyalarına daim sadiq olan, sərhədlərimizin keşiyində qürurla dayanan Azərbaycan sərhədçisinin bundan sonra da yaradılmasının 100 illiyini böyük təntənələrlə qeyd etdiyimiz Azərbaycan Respublikasının müstəqilliyinin simvolu olan dövlət bayrağımızın daima yüksəklərdə dalğalanması üçün əllərindən gələni əsirgəməyəcəklərinə, öz fədakar xidmətləri ilə göstərilən etimadı layiqincə doğruldacaqlarına əminlik ifadə olunmuşdur.
Mərasimdə xidmətdə fərqlənmiş bir qrup hərbi qulluqçuya mükafatlar təqdim olunmuşdur. Tədbirin sonunda Dövlət Sərhəd Xidmətinin Nümunəvi Hərbi Orkestri və incəsənət ustaları sərhədçilər qarşısında geniş konsert proqramı ilə çıxış etmişlər.
08 noyabr 2018-ci il tarixdə Dövlət Sərhəd Xidməti Akademiyasında Dövlət Bayrağı Muzeyinin direktoru, tarix elmləri üzrə fəlsəfə doktoru Könül İmamverdiyevanın akademiyanın kollektivi ilə görüşü keçirilmişdir. K.İmamverdiyeva «Dövlət Bayrağımız qürur mənbəyimizdir» mövzusunda mühazirə-təqdimatla şəxsi heyətin qarşısında çıxış etmişdir. Mühazirədə Azərbaycan Respublikasının Dövlət Bayrağı, həmçinin Azərbaycan ərazisində mövcud olmuş dövlətlərin, xanlıqların bayraqları barədə ətraflı məlumat verilmişdir. K.İmamverdiyeva sərhədçi kursantları maraqlandıran sualları cavablandırmışdır.
Dövlət Sərhəd Xidmətinin Mətbuat Mərkəzi