2018-ci ilin 16 iyun tarixində Dövlət Sərhəd Xidmətinin Xüsusi Məktəbində 2017-2018-ci tədris ilinin başa çatması ilə əlaqədar “Son zəng” tədbiri keçirilmişdir.
DSX Xüsusi Məktəbinin sıra meydanında təşkil olunan tədbir Azərbaycan Respublikasının dövlət himninin ifa olunması ilə başlamışdır.
Dövlət Sərhəd Xidmətinin rəisi general-polkovnik Elçin Quliyevin təbrik teleqramı şəxsi heyətə çatdırılmışdır. Tədbirdə çıxış edənlər tərəfindən ölkəmizdə gənclərin yüksək səviyyəli təhsil almaları, fiziki və mənəvi cəhətdən sağlam böyümələri, layiqli vətəndaş kimi tərbiyə olunmaları üçün böyük imkanların yaradılması, bu məsələlərin Azərbaycan Respublikasının Prezidenti Silahlı Qüvvələrin Ali Baş Komandanı cənab İlham Əliyevin daima diqqət mərkəzində olması, DSX Xüsusi Məktəbinin Heydər Əliyev Fondunun təşəbbüsü və dəstəyi ilə yaranması, Azərbaycan Respublikasının Birinci Vitse-Prezidenti Mehriban xanım Əliyevanın 2011-ci ilin oktyabr ayının 18-də və 2018-ci ilin mart ayının 5-də məktəbdə təşkil olunan açılış mərasimlərində iştirak etməsinin bu diqqətin real göstəricisi olması qeyd olunmuşdur.
Əsas təyinatının kursantları Azərbaycan Respublikasının Prezidentinə, dövlətçiliyinə, xalqına sadiq və vətənpərvər ruhda tərbiyə etmək olan DSX Xüsusi Məktəbində yüksək səviyyəli tədris və təlim şəraitinin yaradılması xüsusi vurğulanmışdır.
DSX Xüsusi Məktəbini 2018-ci ildə bitirən kursantlara xüsusi döş nişanları və qiymətli hədiyyələr təqdim olunmuşdur. Məzunlar DSX Xüsusi Məktəbinin bayrağı ilə vidalaşmaq üçün bayrağın qarşısında təzim etmişlər.
Kursantlar təntənəli marşla tribunanın önündən keçdikdən sonra “Sərhədçi marşı”nı ifa etmişlər. “Son zəng” çalındıqdan sonra məzunlar əllərindəki göyərçinləri səmaya buraxmışlar.
Bundan sonra məzunlar DSX Xüsusi Məktəbinin “məzun simvolu” olan rəmzi nar ağacında üzərində “2018-ci ilin məzunları” yazılmış nar meyvəsinə adları və soyadları yazılmış siyahını sancmışlar.
Tədbirin sonunda məzunlar məktəbin foyesində Dahi Öndər Heydər Əliyevin büstü önünə tər qızılgüllər qoyaraq təzim etmiş və xatirə fotoşəkili çəkdirmişlər.
Tədbirdə Dövlət Sərhəd Xidməti rəisinin birinci müavini – Baş Qərargah rəisi general-leytenant Rəşad Sadiqov iştirak etmişdir.
Dövlət Sərhəd Xidmətinin Mətbuat Mərkəzi
