Dövlət Sərhəd Xidmətinin Sahil Mühafizəsi tərəfindən Xəzər dənizinə çıxan üzmə vasitələrinə nəzarətin təşkili və xilasetmə tədbirlərinin həyata keçirilməsi davam etdirilir.
17 noyabr 2017-ci tarixdə DSX Sahil Mühafizəsinin “Pirallahı” sahil nəzarəti məntəqəsinin əməkdaşları tərəfindən xidməti əraziyə baxış keçirilərkən “PR-1960” bort nömrəli balıqçı qayığının yanalma körpüsündə olmaması aşkar edilmişdir.
Hava şəraitinin kəskin dəyişəcəyi nəzərə alınaraq, həmin qayıqda dənizə çıxmış balıqçıların xilas edilməsi üçün təxirəsalınmaz tədbirlər görülmüş, balıqçı qayığının gecə saatlarında Çilov adasının qərb reydində köhnə dirəyə çırpılması müəyyən olunmuşdur.
Axtarış-xilasetmə tədbirləri nəticəsində icazəsiz olaraq dənizə çıxmış balıqçılar - Pirallahı rayon sakinləri Qurbanov Arif Umud oğlu və Məlikov Ramiz Tofikoviç suda olan dirəyin üzərində aşkar olunmuş və 18 noyabr 2017-ci ildə saat 13:20 radələrində xilas edilərək sahilə təxliyyə olunmuşlar.
DSX Sahil Mühafizəsinin sərhəd gözətçi gəmisi tərəfindən dənizdə yarıbatmış vəziyyətdə olan “PR-1960” bort nömrəli balıqçı qayığı da aşkarlanaraq sahilə çıxarılmışdır.
Dövlət Sərhəd Xidmətinin Mətbuat Mərkəzi