Dövlət Sərhəd Xidməti tərəfindən cari ilin sentyabr ayı ərzində dövlət sərhədinin etibarlı mühafizəsi istiqamətində məqsədyönlü tədbirlər həyata keçirilmiş, qaçaqmalçılığa, qeyri-leqal miqrasiyaya, narkotik vasitələrin qeyri-qanuni dövriyyəsinə qarşı mübarizə uğurla davam etdirilmişdir.
Ay ərzində dövlət sərhədini pozduqları üçün 34 halda 49 nəfər saxlanılmış, onların 24 nəfəri Azərbaycan Respublikası, 10 nəfəri Gürcüstan, 8 nəfəri Özbəkistan, 2 nəfəri İran İslam Respublikası, 2 nəfəri Moldova, hər ölkədən 1 nəfər olmaqla Ukrayna, Qırğızıstan və Pakistan vətəndaşı olmuşdur. Sərhəd rejim qaydalarını pozarkən 1355 halda 1614 nəfər saxlanılaraq barələrində müvafiq tədbir görülmüşdür.
Cinayətkarlığa qarşı mübarizə tədbirləri nəticəsində Azərbaycan Respublikası hüquq-mühafizə orqanları tərəfindən axtarışda olan 197 nəfər aşkarlanaraq aidiyyəti orqanlara təhvil verilmişdir.
Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 6 halda 3 kiloqram 323,4 qram narkotik maddənin dövlət sərhədindən keçirilməsinin qarşısı alınmışdır.
Qaçaqmalçılıq fəaliyyətinə qarşı mübarizə çərçivəsində həyata keçirilmiş tədbirlər nəticəsində 64 halda ümumi dəyəri təqribən 308 min manat olan qaçaqmal, o cümlədən 1 ədəd pnevmatik tapança, tapança üçün 4,5 millimetrlik 500 ədəd qırma, 75 ədəd 16 və 12 millimetrlik patron, 1000 ədəd piston, 1 kiloqram barıt, 1 ədəd müşahidə kamerası, 20 ədəd qısa məsafəli rabitə vasitəsi, 913 ədəd mobil telefon, 699 ədəd mobil telefon aksesuarları, 347 ədəd araq, 6325 qutu siqaret, 40 min ABŞ dolları, 1450 qram gümüş zinət əşyaları, müxtəlif növ dərman preparatları, ərzaq, sənaye və kənd təsərrüfatı malları saxlanılmışdır.
Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.