Dövlət Sərhəd Xidməti tərəfindən narkotik vasitələrin qanunsuz dövriyyəsi və qaçaqmalçılığa qarşı mübarizə tədbirləri davam etdirilir.
17 aprel 2015-ci il tarixdə səhər saat beş radələrində Cəlilabad rayonunun Dələli kəndi ərazisindəki sərhəd zastavasının xidməti sahəsində 3 nəfərdən ibarət silahlı qaçaqmalçı qrup tərəfindən külli miqdarda narkotik maddə olan 2 kq heroinin və 3 kq marixuananın Azərbaycan Respublikasına gətirilməsinin qarşısı alınmışdır.
Sərhəd pozucuları sərhəd naryadının qanuni tələbinə tabe olmamış və müqavimət göstərmişlər. Sərhəd naryadı tərəfindən silahın təlimata uyğun tətbiqi nəticəsində bir nəfər sərhəd pozucusu yaralanmışdır. Cinayətkar dəstənin digər üzvləri havanın qaranlıq olmasından və ərazinin relyef xüsusiyyətlərindən istifadə edərək hadisə yerindən yayınmışlar. Yaralı sərhəd pozucusuna zəruri tibbi yardım göstərilmişdir, hazırda vəziyyəti stabildir.
Cinayətin digər iştirakçılarının müəyyən edilməsi və saxlanılması istiqamətində əməliyyat-axtarış və istintaq tədbirləri davam etdirilir.