Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin diqqət və qayğısı sayəsində Dövlət Sərhəd Xidmətinin maddi-texniki bazası möhkəmləndirilmiş, idarəetmə sistemi təkmilləşdirilmişdir. Dövlət Sərhəd Xidmətinin texniki bazasının gücləndirilməsi və modernləşdirilməsi, müasir döyüş texnikası və digər texniki vasitələrin alınaraq sərhədlərimizin mühafizəsi işində tətbiq edilməsi əsas vəzifələrdən biridir və bu proses uğurla davam etdirilir.
Yeni alınmış texnikaların döyüş sıralarına qəbul edilməsi ilə əlaqədar aprel ayının 19-da Dövlət Sərhəd Xidmətinin Aviasiya dəstəsinin bazasında tədbir keçirilmişdir. Azərbaycan Respublikası Baş nazirinin birinci müavini Yaqub Eyyubov və Dövlət Sərhəd Xidmətinin rəisi–Sərhəd Qoşunlarının Komandanı general-leytenant Elçin Quliyev müxtəlif döyüş texnikalarına- Mi-35, Mi-17, Mi-8 helikopterlərinə və «Kobra» tipli yüngül zirehli döyüş maşınına, «LAND-ROVER» tipli şəxsi heyət daşıyan zirehli maşına, «LAND-ROVER-110» tipli çevik hərəkət maşınına baxış keçirmişlər.
Nümayiş etdirilən helikopterlərin və zirehli döyüş texnikalarının taktiki-texniki imkanları barədə məlumatlar verilmişdir. Yeni alınmış döyüş texnikaları müxtəlif hərbi tapşırıqları yerinə yetirmək üçün geniş imkanlara malikdir və ən müasir silahlarla təchiz olunmuşdur. Helikopterlərin və müxtəlif təyinatlı döyüş avtomobillərinin səmərəli istifadəsi Vətənimizin hüdudlarının mühafizəsi işinin səviyyəsinin daha da yüksəldilməsində mühüm rol oynayacaqdır.
Sonra Mi-35 helikopterinin nümunəvi uçuşu nümayiş etdirilmişdir. 45 dərəcə bucaq altında forsaclı döngələr, şığıma, yüksəlmə, döyüş dönməsi, dönmə uçuşu və digər mürəkkəb elementlər uğurla icra olunmuşdur.
Dövlət Sərhəd Xidmətinin rəisi–Sərhəd Qoşunlarının Komandanı general-leytenant Elçin Quliyev döyüş sıralarına yeni daxil edilən texnikaların səmərəli tətbiqinə dair müvafiq tapşırıqlar vermiş, Mi-35 helikopterinin nümunəvi uçuşları zamanı peşəkarlıq göstərən heyət üzvlərinə təşəkkür elan etmişdir.