2014-cü il 16-20 avqust tarixlərində Dövlət Sərhəd Xidmətinin rəisi general-polkovnik Elçin Quliyevin dəvəti ilə Əfqanıstan İslam Respublikası Daxili İşlər Nazirliyi Sərhəd Polisinin Komandanı general-leytenant Məhəmməd Şəfiq Fəzlinin rəhbərlik etdiyi nümayəndə heyəti Azərbaycan Sərhəd Mühafizəsinin 95-ci ildönümünə həsr olunmuş təntənəli mərasimdə iştirak etmək məqsədilə ölkəmizə səfər etmişdir.
19 avqust 2014-cü il tarixdə Dövlət Sərhəd Xidmətinin aparatında general-leytenant Məhəmməd Şəfiq Fəzlinin təntənəli qarşılanma mərasimi keçirilmişdir. Protokola uyğun olaraq Əfqanıstan İslam Respublikası Sərhəd Polisinin Komandanı Şərəf dəftərinə ürək sözlərini yazmışdır.
Azərbaycan Respublikası Dövlət Sərhəd Xidmətinin rəisi general-polkovnik Elçin Quliyev və Əfqanıstan İslam Respublikası Daxili İşlər Nazirliyi Sərhəd Polisinin Komandanı general-leytenant Məhəmməd Şəfiq Fəzlinin rəhbərlik etdikləri nümayəndə heyətləri arasında geniş tərkibdə görüş keçirilmişdir.
Görüşdə sərhəd təhlükəsizliyi məsələləri, dövlət sərhədlərinin mühafizəsinin təkmilləşdirilməsi tədbirləri, əldə olunmuş xidməti nailiyyətlər müzakirə olunmuş, qurumlar arasında əməkdaşlığın perspektivlərinə və qarşılıqlı maraq doğuran digər məsələlərə dair fikir mübadiləsi aparılmışdır.
Müzakirələr zamanı Əfqanıstan sərhəd polisi əməkdaşlarının DSX Akademiyasında uzun müddətli akademik təlimlərdə, eləcə də müxtəlif ixtisas sahələri üzrə təkmilləşdirmə kurslarında iştirakı ilə bağlı ikitərəfli əlaqələrin genişləndirilməsinin vacibliyi vurğulanmışdır.
Səfər çərçivəsində Əfqanıstan nümayəndə heyəti Bakı şəhərinin tarixi – mədəni yerləri ilə tanış edilmişlər.
Səfər dostluq və qarşılıqlı anlaşma şəraitində keçmişdir.
Dövlət Sərhəd Xidmətinin Mətbuat mərkəzi