Azərbaycan Respublikası Prezidentinin 11 sentyabr 2013-cü il tarixli Sərəncamı ilə təsdiq olunmuş “Azərbaycan Respublikasının dəniz təhlükəsizliyi strateqiyası”na əsasən Dövlət Sərhəd Xidmətinə həvalə edilmiş vəzifələrinin icrası, o cümlədən Xəzər dənizində dövlət sərhədlərinin mühafizəsi sahələrində mümkün təhdidlərin qarşısının alınması üzrə qüvvə və vasitələrinin gücləndirilməsi istiqamətində zəruri tədbirlər davam etdirilir.
Bu sırada Dövlət Sərhəd Xidmətinin Sahil Mühafizəsinin Bakı şəhərinin Türkan qəsəbəsində yerləşən bazasında 13m 2 ərazidə yeni inşa olunmuş “Gəmi inşası zavodu”nun xidməti istifadəyə verilməsi mühüm əhəmiyyət kəsb edir. Artıq həmin zavodun imkanları hesabına DSX Sahil Mühafizəsi üçün 2 ədəd itisürətli və yüksək üzmə qabiliyyətli 3-cü dərəcəli sərhəd gözətçi gəmilərinin inşası başa çatmışdır. Müasir naviqasiya və rabitə-radiotexnika avadanlıqları ilə tam təmin olunmuş, Xəzər dənizində ağır üzmə şəraitində xidməti vəzifələri yerinə yetirə bilən sərhəd gözətçi gəmiləri müasir silahlarla təchiz edilmişdir.
Xəzər dənizinin Azərbaycana mənsub olan bölməsində dövlət sərhədlərinin mühafizəsi, sərhədboyu rejimin təmin olunması, karbohidrogen ehtiyatlarının hasilatı və nəqli infrastrukturunun təhlükəsizliyinin təmin olunması istiqamətində xidməti vəzifələrin icrası zamanı yeni gəmilərin imkanlarından geniş istifadə olunacaqdır.
Hazırda 100 nəfərədək mütəxəssisin işlə təmin olunduğu “Gəmi inşası zavodu”nda yeni 2-ci dərəcəli sərhəd gözətçi gəmilərinin inşasına başlanmışdır.Yaxın müddətdə zavodun imkanları hesabına DSX Sahil Mühafizəsinin sərhəd gözətçi gəmilərinin tam yenilənməsinə və nəticə etibarı ilə sərhəd sularında dövləti maraqların qorunması imkanlarının əhəmiyyətli dərəcədə genişləndirilməsinə nail olunacaqdır.
Dövlət Sərhəd Xidməti Mətbuat Mərkəzi