21.06.2019, 12:54- Dövlət Sərhəd Xidmətinin Mətbuat Mərkəzinin Məlumatı

Azərbaycan Respublikası Dövlət Sərhəd Xidməti ilə Qazaxıstan Res­publikası Milli Təhlükəsizlik Komitəsinin Sərhəd Xidməti arasında 2019-cu il üçün təsdiq edilmiş Tədbirlər Planına müvafiq olaraq nəzərdə tutulmuş əməkdaşlıq əlaqələri uğurla davam etdirilir.

Birgə əməkdaşlıq çərçivəsində cari ilin 19-21 iyun tarixlərində Qaza­xıstan Respublikasının Milli Təhlükəsizlik Komitəsi Sərhəd Xidmətinin Regional Sahil Mühafizəsinin İdarə rəisi polkovnik Alibek Kayupovun rəhbərlik etdiyi nümayəndə heyəti “Sarbaz” sərhəd gözətçi gəmisi ilə Azərbaycan Respublikasına dostluq səfəri etmişdir.

Səfər zamanı tərəflər arasında ikitərəfli əlaqələrin inkişafına dair fikir mübadiləsi aparılmış, Xəzər dənizində sərhəd təhlükəsizliyinin təmin edil­məsi, birgə əməliyyat-profilaktik tədbirlərinin keçirilməsi, bioloji resursların qorunması, qanunsuz fəaliyyətlərə qarşı mübarizə sahəsində əməkdaşlığın genişləndirilməsi məsələləri müzakirə olunmuşdur.

Səfər müddətində  “Sərhədçi” İdman Olimpiya Mərkəzində Azərbaycan və Qazaxıstan Sahil Mühafizələrinin əməkdaşları arasında futbol üzrə yoldaşlıq görüşü keçirilmiş, qarşılıqlı olaraq tərəflərin sərhəd gözətçi gəmilərinə ziyarət edilmişdir.

Qonaqlar mədəni tədbirlər çərçivəsində Bakı şəhərinin mədəni-tarixi abidələri, “İçərişəhər”, “Qız Qalası”, “Atəşgah” və “ Qala” muzeyləri ilə tanış edilmişlər.

Səfər dostluq və qarşılıqlı anlaşma şəraitində keçmişdir.

 

Dövlət Sərhəd Xidmətinin mətbuat mərkəzi

  • 80
  • 80
  • 80
  • 80
  • 80
  • 80
  • 80
  • 80