Dövlət Sərhəd Xidməti tərəfindən narkotik vasitələrin qanunsuz dövriyyəsinə qarşı mübarizə tədbirləri nəticəsində dövlət sərhədindənkülli miqdarda narkotik vasitələrin Azərbaycan Respublikasına gətirilməsinin qarşısı alınmış,ümumilikdə 18 kiloqrama yaxın narkotik vasitə saxlanılmışdır.
Belə ki, 10 may 2015-ci il tarixdə saat 00:45 radələrində Füzuli rayonunun Bala-Bəhmənli kəndi ərazisindəki sərhəd zastavasının xidməti sahəsində Dövlət Sərhəd Xidmətinin əməkdaşları tərəfindən həyata keçirilmiş əməliyyat-axtarış tədbirləri nəticəsində 15 kq narkotik vasitə olan həşiş qətranının Azərbaycan Respublikasına gətirilməsinin qarşısı alınmışdır. Sərhəd pozucusu dövlət sərhəd xəttinin bilavasitə yaxınlığında olmasından istifadə edərək geriyə qaçmağa müvəffəq olmuşdur.
Bundan başqa Horadiz sərhəd dəstəsinin Füzuli rayonunda yerləşən sərhəd zastavasının xidməti ərazisində 10 may 2015-ci il tarixdə saat 01:50 radələrində Dövlət Sərhəd Xidmətinin əməkdaşları tərəfindən həyata keçirilmiş digər əməliyyat-axtarış tədbiri nəticəsində narkotik vasitələrin qanunsuz dövriyyəsi ilə məşğul olan Saatlı rayon sakini, 1981-ci il təvəllüdlü Rüstəmov İlham Qardaşxan oğlu 3 kq marixuana ilə birlikdə saxlanılmışdır.
Qeyd olunan faktlarla bağlı Dövlət Sərhəd Xidmətinin İstintaq və Təhqiqat İdarəsi tərəfindən Azərbaycan Respublikası CM-nin 206-cı (qaçaqmalçılıq) və 234-cü (narkotik vasitələrin qanunsuz dövriyyəsi) maddələri ilə cinayət işi başlanılmışdır. Saxlanılmış şəxs barəsində məhkəmənin qərarı ilə həbs qətimkan tədbiri seçilmişdir.
Hazırda həmin cinayət işləri üzrədigər iştirakçıların müəyyən edilərək məsuliyyətə cəlb olunması məqsədilə zəruri əməliyyat-istintaq tədbirləri davam etdirilir.
Dövlət Sərhəd Xidmətinin mətbuat mərkəzi