2014-cü il iyul ayının 19-da Dövlət Sərhəd Xidmətinin Nümunəvi Hərbi Orkestri Rusiya Federasiyasının Dağıstan Respublikasının Mahaçqala şəhərində keçirilən “Nəfəsli orkestrlərin II Beynəlxalq festivalı”nda iştirak etmişdir.
08-26 iyul 2014 –cü il tarixlərdə keçirilən festivalda Həştərxan şəhər filarmoniyasının nəfəsli orkestri, Dağıstan Respublikasının 102-ci briqadasının hərbi orkestri, Dağıstan Dövlət Filarmoniyasının nəfəsli alətlər orkestri, Rusiya Federasiyası FTX Sərhəd Qoşunlarının hərbi orkestri, Dağıstan Respublikasının nəfəsli musiqi uşaqyeniyetmə ansamblları da iştirak edirlər.
İyul ayının 19-da saat 18:00-da Mahaçqala şəhərinin Rodop bulvarında DSX Nümunəvi Hərbi Orkestrinin möhtəşəm bayram yürüşü təşkil olunmuşdur.
Həmin gün saat 19:00-da Dağıstan Dövlət Filarmoniyasının yay zalında DSX Nümunəvi Hərbi Orkestrinin Üzeyir Hacıbəyov, Qara Qarayev, Fikrət Əmirov, Pyotr Çaykovski kimi bəstəkarların əsərlərindən, həmçinin məşhur klassik və caz kompozisiyalarından ibarət konsert proqramı tamaşaçıların diqqətinə təqdim olunmuşdur.
Konsert proqramı şəhər sakinləri və festivalın qonaqları tərəfindən böyük maraq və sürəkli alqışlarla qarşılanmışdır. Tamaşaçıların israrlı alqışları ilə əlaqədar orkestr tərəfindən proqramdan kənar bir neçə əsər də ifa olunmuşdur.
Tədbirin sonunda Azərbaycan musiqiçilərinə təşkilatçılar tərəfindən fəxri fərmanlar və qiymətli hədiyyələr verilmişdir.
Dövlət Sərhəd Xidməti Mətbuat Mərkəzi
